ក្រោយឃើញ មឿន សុខហ៊ុច អាចទទួលបានឱកាសទីបីស្រាប់តែ ផល សោភ័ណ្ឌ បានលាន់មាត់បែបនេះ

  

កីឡាករដំរីភ្លុកពិឃាត ផល សោភ័ណ្ឌ ក៏ចង់មានឈ្មោះប្រកួតដណ្តើមឡានម្តងទៀតផងដែរក្រោយឃើញ មឿន សុខហ៊ុច បរាជ័យក្នុងឱកាសទីពីរ និងកំពុងទទួលបានឱកាសទីបីពីលោក ឧកញ៉ា ស្រី ចាន់ថន។អានព័ត៌មានកីឡាថ្មីៗ

យើងបានដឹងហើយថាម្ចាស់ឡានខ្លាញ់គោថ្មីពី Boostrong បានទៅលើកីឡាករ ចាន់ ប៊ុន ហឿន បន្ទាប់ពីបានយកឈ្នះកីឡាករ មឿន សុខហ៊ុច នៅក្នុងវគ្គផ្តាច់ព្រ័ត កាលពីថ្ងៃទី 28 ខែមិនាកន្លងទៅនេះនៅទីរួមខេត្តស្វាយរៀង។

ដោយបេក្ខភាពដណ្តើមឡានទាំងបួនរូបមានដូចជា កីឡាករ ចាន់ ប៊ុនហឿន បានផ្តួលកីឡាករឡាវ ខាំភូ តាមរយៈការវៃចូលពោះទឹកផ្ទួនៗធ្វើអោយរូបគេបោះបង់ការប្រកួតនៅក្នុងទឹកទីមួយ។

រីឯ មឿន សុខហ៊ុច បានផ្តួលកីឡាករអ៊ីរ៉ង់ Mohamed Reza អោយបោះបង់ការប្រកួតនៅក្នុងទឹកទីពីរ ។ បេក្ខភាពពីររូបទៀតគឺ សូត្រ វាសនា បានត្រឹមឈ្នះពិន្ទុកីឡាករអ៊ីរ៉ង់ រីឯ ធន់ ចាន់តាក់ ចាញ់កីឡាករប៉េរូដោយពិន្ទុ។

តាមរយៈរូបមន្តផ្តួលដៃគូអោយសន្លប់ ចាន់ ប៊ុនហឿន និង មឿន សុខហ៊ុច បានដឹកដៃគ្នាឡើងទៅកាន់វគ្គផ្តាច់ព្រ័តដណ្តើមឡាន។

ដោយម្ចាស់ឡានគឺបានទៅលើ ចាន់ ប៊ុនហឿន បន្ទាប់ពីបានយកឈ្នះ មឿន សុខហ៊ុចដោយពិន្ទុ ។ សម្លេងសើចក្អាកក្អាយសប្បាយរីករាយរបស់អ្នកឈ្នះ លាយឡំដោយភាពសោកសៅរបស់អ្នកចាញ់ ក៏កើតមានឡើងក្នុងពេលតែមួយ ។

ត្បិតអីនេះជាឱកាសទីពីររបស់ មឿន សុខហ៊ុច ហើយក៏ជាឱកាសចុងក្រោយផងដែរ ខណៈដែលកាលពីលើកទីមួយរូបគេបានប្រកួតចាញ់ លន បញ្ញា នៅក្នុងវគ្គផ្តាច់ព្រ័តត្រឹមទឹកទីពីរ និងបន្តចាញ់ ចាន់ ប៊ុនហឿន ម្តងទៀតនៅក្នុងវគ្គផ្តាច់ព្រ័តដូចគ្នា។

ក្រោយឃើញបែបនេះលោក ឧកញ៉ា ស្រី ចាន់ថន ក៏បានផ្តល់ឱកាសអោយ មឿន សុខហ៊ុច សម្រាប់ការចូលរួមប្រកួតដណ្តើមឡានម្តងទៀតនៅក្នុងកម្មវិធីគុនខ្មែរ KKIF របស់លោក ឧកញ៉ា ផ្ទាល់តែម្តង ។

តាមរយៈការឆ្លើយតប comment ជាមួយអ្នកគាំទ្រលោកឧញ៉ា ស្រី ចាន់ថន បានសរសេរយ៉ាងដូច្នេះថា “ចាំបងរៀបចំប្រកួតកម្មវិធី KKIF អោយ សុខហ៊ុច ប្រកួតយកឡានម្តងទៀត”។

បន្ទាប់ពីបានឃើញ មឿន សុខហ៊ុច អាចនឹងទទួលបានឱកាសទីបីពីលោក ឧកញ៉ា ស្រី ចាន់ថន បែបនេះ កីឡាករ ផល សោភ័ណ្ឌ ក៏បានបង្ហោះសារបង្ហាញពីអារម្មណ៍របស់ខ្លួនថា ចង់ទទួលបានឱកាសប្រកួតដណ្តើមឡានម្តងទៀតដែរ ដោយរូបគេបានធ្វើការបង្ហោះនៅលើទំព័រផ្លូវការរបស់ខ្លួនបែបនេះ។

“អបអរសាទរ ប្អូនប្រុស ចាន់ ប៊ុនហឿន ដែលទទួលបានឡានពី Boostrong ហើយក៏ចូលរួមសោកស្ដាយ មឿន សយខហ៊ុច ផងដែរ តើខ្ញុំពេលណាទើបមានឱកាស ដើម្បីដណ្ដើម ( ឡាន ) ម្ដងទៀត? រឺ មួយក៏ខ្ញុំគ្មានឱកាសទៀតទេ? សង្ឃឹមថាខ្ញុំហ្នឹងមានឱកាសម្ដងទៀតមុនពេលខ្ញុំអស់លទ្ធភាពប្រកួតទៅចុះ”។​