Luis Suarez ប្រហែលជាត្រូវបង្ខំចិត្តចូលនិវត្តន៍ពីបាល់ទាត់ ក្រោមហេតុផល ដ៏ឈឺចាប់មួយ

 

Luis Suarez បានប្រាប់ក្លឹបបច្ចុប្បន្នរបស់គាត់គឺ Gremio ថាគាត់នឹងចូលនិវត្តន៍ពីបាល់ទាត់ហើយ នេះបើយោងតាម GZH។

កីឡាករអ៊ុយរូហ្គាយរូបនេះ មានបញ្ហាឈឺជង្គង់ ដែលនេះធ្វើឱ្យអតីតខ្សែប្រយុទ្ធ Barcelona ពិបាកក្នុងការបន្តអាជីពបាល់ទាត់របស់គាត់បន្តទៀត។ ស្របពេលបច្ចុប្បន្ន ក្រោយពីចាកចេញពីក្លិបយក្សអេស្ប៉ាញ Atlético Madrid នៅឆ្នាំ២០២២ តារាជើងស៊ុតរូបនេះ បានផ្លាស់ទៅលេងនៅក្លិបប្រេស៊ីល Gremio។

អ្នកតំណាងរបស់កីឡាករវ័យ ៣៦ ឆ្នាំរូបនេះ នឹងជួបក្លឹបនៅប៉ុន្មានថ្ងៃខាងមុខនេះ ដើម្បីពិភាក្សារអំពីគម្រោងបញ្ចប់អាជីពបាល់ទាត់របស់ Luis Suarez ។ ជាមួយគ្នានេះ កិច្ចសន្យារបស់អតីតកីឡាករហ្សងក្រហម Liverpool នឹងត្រូវផុតកំណត់នៅខែធ្នូ ឆ្នាំ ២០២៤ ខណៈ Suarez ប្រហែលជាមិនអាចគោរពតាមកុងត្រាដែលបានកំណត់នោះទេ ដោយសារបញ្ហារបួសមិនអាចបន្តអាជីពបាន។

មានព័ត៌មានមួយចំនួនបាននិយាយថា ក្លិប Inter Miami បានចាប់អារម្មណ៍ក្នុងការចុះហត្ថលេខាលើតារាឆ្នើមរូបនេះ ប្រសិនបើគាត់សម្រេចចិត្តចាកចេញពីក្លិបប្រេស៊ីល Gremio ប៉ុន្តែឥលូវនេះ Luis Suarez បានសម្រេចបញ្ចប់អាជីពជាកីឡាករបាល់ទាត់របស់គាត់បាត់ទៅហើយ។តាមដានព័ត៌មានបាល់ទាត់ថ្មីៗ