កាន់ ម៉េងហុង តំណាងគុនខ្មែរហោះឆ្លងទ្វីបទៅដណ្ដើមខ្សែក្រវាត់នៅជប៉ុនតែគ្មានវត្តមាន ធឿន ធារ៉ា

 

ក្រោយមិត្តកម្ពុជា-ជប៉ុនកោះហៅកីឡាករគុនខ្មែរមួយរូបចូលរួមប្រកួតដណ្ដើមខ្សែក្រវាត់នៅទីក្រុងតូក្យូ ប្រទេសជប៉ុន ពេលនេះមានការបង្ហាញផូស្ទើរពីស្ថាប័នK-1 មកថាកីឡាករកម្ពុជា កាន់ ម៉េងហុង ជាបេក្ខភាពចូលរួមប្រកួតដណ្ដើមខ្សែក្រវាត់កម្រិតពិភពលោក K-1 WORLD MAX​ ១ខ្សែ នៅថ្ងៃទី០៧កក្កដា ឆ្នាំ២០២៤ ខាងមុខតែគ្មានវត្តមានសិស្សច្បង ធឿន ធារ៉ា។

លោកឧកញ៉ា ស្រី ចាន់ថន ដែលជាអ្នករៀបចំកម្មវិធីប្រដាល់គុនខ្មែរដ៏ល្បីប្រចាំសង្វៀនKKIF បានបង្ហោះសារកាលពីពេលថ្មីៗនេះថា«ជម្រាបសួរដល់បងប្អូនទាំងអស់គ្នាប្អូនប្រុស កាន់ ម៉េងហុង ដែលជាម្ចាស់មេដាយមាសស៊ីហ្គេមឆ្នាំ 2023 ជាបេក្ខភាពចេញទៅ ប្រកួតម៉ារ៉ាតុនដណ្ដើមខ្សែក្រវាត់ K-1 WORLD MAX ជាលើកដំបូងបំផុតក្នុងប្រវត្តិសាស្ត្រប្រដាល់កម្ពុជា ក្នុងប្រភេទទម្ងន់៥៥Kg។”អានពត៌មានកីឡាប្រចាំថ្ងៃ

សូមជូនពរដល់ប្អូនប្រុសទទួលជោគជ័យ និងនាំយកជ័យជម្នះមកជូនជាតិកម្ពុជា»។ សារនេះបញ្ជាក់ឱ្យឃើញច្បាស់ៗថា​ គឺកីឡាករគុនខ្មែរ កាន់ ម៉េងហុង នឹងត្រូវហោះឆ្លងទ្វីបចេញទៅប្រកួតតំណាងឱ្យកម្ពុជាប្រសិនបើពុំមានអ្វីប្រែប្រួល​។

សូមរំឭកដែរថា ពេលដែលស្ថាប័ន K-1 បានអញ្ជើញកីឡាករកម្ពុជាចូលរួមប្រកួតដណ្ដើមខ្សែក្រវាត់កម្រិតពិភពលោកមួយនេះ មហាជនមានការរំពឹងខ្ពស់ទៅលើអ្នកលេងពូថៅដៃពិឃាត ធឿន ធារ៉ា និង ក្របីព្រៃ ពេជ្រ សម្បត្តិ ថាជាកីឡាករសាកសមបំផុត និង មានសមត្ថភាពឡើងទៅប្រកួតនៅលើសង្វៀនលំដាប់ថ្នាក់ពិភពលោកមួយនេះ។ 

អ្នកគាំទ្រសម្ដែងការខកចិត្តខ្លះដែរ នៅពេលដែលបានឃើញបេក្ខភាពកីឡាករមិនមែនជាអាយដលរបស់ខ្លួនទៅវិញ។ ប៉ុន្តែក្ដីសង្ឃឹមរបស់អ្នកគាំទ្រនៅមិនទាន់បោះបង់ចោលនៅឡើយទេដ៏រាបណាកីឡាករម្ចាស់ផ្ទះជប៉ុន២រូប រួមមាន៖ កីឡាករ​ យ៉ូកូយ៉ាម៉ា តូម៉ូយ៉ា ឈរក្នុងប្រភេទទម្ងន់៦០គីឡូក្រាម និងកីឡាករ ម៉ាត់ស៊ូគូរ៉ា ស៊ីនតារ៉ូ ឈរក្នុងប្រភេទទម្ងន់៧២គីឡូក្រាម នៅមិនទាន់រកដៃគូខ្លួនឃើញនៅឡើយ។

មែនទែនទៅ សម្រាប់កីឡាករគុនខ្មែរ ដែលនឹងហោះឆ្លងទ្វីបចេញទៅប្រកួតនៅឯបរទេសមិនថាជាកីឡាកររូបណានោះឡើយ ដូចតែគ្នាទេព្រោះពួកគេគឺមានគោលដៅតែមួយ គឺចេញទៅផ្សព្វផ្សាយគុនខ្មែរ។ ទោះយ៉ាងណាសម្រាប់កីឡាករគុនខ្មែរ កាន់ ម៉េងហុង ដែលត្រូវឡើងទៅដណ្ដើមខ្សែក្រវាត់ K-1 WORLD MAX នាពេលនេះគឺសាកសមបំផុតហើយ។ 

ព្រោះកីឡាករគុនខ្មែររូបនេះមានបទពិសោធយ៉ាងជោគជាំនៅលើសង្វៀនមិនថាការប្រកួតលក្ខណៈគុនខ្មែរ ឬឃីកបុកស៊ីងឡើយរូបគេតែងនាំយកជោគជ័យមកកម្ពុជាជាហូរហែ មិនតែប៉ុណ្ណោះរូបគេក៏ធ្លាប់ជាម្ចាស់មេដៃមាសស៊ីហ្គេមឆ្នាំ២០២៣ផងដែរ៕